Ymgynghoriadau newid ymddygiad iechyd drwy gyfrwng iaith gyntaf yr unigolyn: astudiaeth ansoddol ar sail Theori Hunanbenderfyniad

Gall unigolion dwyieithog gyfleu ymatebion emosiynol cryfach yn eu hiaith gyntaf a all arwain at newid ymddygiad. Nod yr astudiaeth oedd archwilio safbwyntiau unigolion ynghylch ymgynghoriadau newid ymddygiad yn eu hiaith gyntaf neu ieithoedd eraill. Defnyddiwyd dull ansoddol drwy 12 cyfweliad lled-strwythuredig a ddadansoddwyd gan ddefnyddio dull thematig. Mapiwyd y themâu ac is-themâu i’r Theori Hunanbenderfyniad, sef Ymreolaeth, Perthynasrwydd a Chymhwysedd.

Noda’r canlyniadau fod cynnal ymgynghoriadau yn iaith gyntaf yr unigolyn, hyd yn oed os nad ydynt wedi’u cynnal yn gyfan gwbl yn yr iaith gyntaf, yn gallu cymell yr unigolyn i newid ei ymddygiad iechyd. Mae’r canlyniadau’n crybwyll bod angen rhagor o hyfforddiant ac adnoddau iaith ar ymgynghorwyr er mwyn gallu darparu cynnig gweithredol a fydd yn annog y claf i wneud ei benderfyniadau ei hun am ei ofal, a all arwain at newid ymddygiad iechyd.